Мемлекет басшысының төрағалығымен Қауіпсіздік кеңесінің отырысы өтті

11 шілде 2017, 17:57
Фото: akorda.kz

Отырыста киберқауіпсіздікті қамтамасыз ету мен терроризмнің алдын алу жөніндегі өзекті мәселелер талқыланды. Бұл туралы Ақорданың баспасөз қызметі хабарлайды.

Қазақстан Президенті қазіргі кезде цифрлық технологияларды енгізудің маңыздылығына тоқталып, бұл ретте кибер қауіп-қатерге және ақпараттық технологияларды заңсыз пайдалануға қарсы тұру қажеттігін атап өтті.

«Ақпараттық-коммуникациялық технологиялар адам өмірі мен мемлекеттің барлық саласында кездеседі. Сондықтан мен «Қазақстанның үшінші жаңғыруы: жаһандық бәсекеге қабілеттілік» атты жолдауда цифрлық технологияларды дамыту мақсатын қойдым. Оның пайдасы зор, бірақ оны енгізумен бірге кибершабуылдар жасау қаупі де туындайды. Сол себептен Қазақстан оған дайын болуға тиіс», – деді Нұрсұлтан Назарбаев.

Мемлекет басшысы жиынға қатысушылар назарын еліміздегі және әлемдегі террористік топтардың деструктивті әрекеттерінің салдарларына аударып, оларға қарсы тиімді жұмыстар жүргізуді бір жолға қою қажеттігін айтты.

Соңында Қазақстан Президенті бірқатар нақты тапсырма берді.