ВАК отырысында «Аshyq» қатысушылары мен оффлайн-конференциялар бойынша бірқатар шешім қабылданды

Бүгін ҚР Премьер-Министрінің орынбасары Ералы Тоғжановтың төрағалығымен ҚР аумағында коронавирус инфекциясының таралуына жол бермеу жөніндегі ведомствоаралық комиссия отырысы өтті.

Денсаулық сақтау министрі Алексей Цой елдегі санитариялық-эпидемиологиялық жағдай туралы баяндама жасады. Соңғы екі аптада COVID-19-бен ауыру 60%-ға, өлім-жітім деңгейі 80%-ға төмендеді. Инфекциялық төсек орындары жүктемесінің 56%-дан 33%-ға дейін, реанимациялық төсектердің 45%-дан 32%-ға дейін төмендегені байқалады.

Сондай-ақ эпидемиологиялық жағдайдың жақсаруына байланысты ведомствоаралық комиссия барлық санитариялық талаптарды қатаң сақтай отырып, брифингтер мен баспасөз конференцияларын күндізгі режимде өткізу туралы шешім қабылдады. Осылайша, ҚР Президенті жанындағы Орталық коммуникациялар қызметі мен өңірлік коммуникациялар орталықтары базасында «Аshyq» қосымшасында «жасыл» мәртебесі бар БАҚ өкілдері офлайн форматта баспасөз конференцияларына қатыса алады.

Комиссия отырысы барысында ел өңірлеріндегі коронавирус инфекциясы жағдайы және азаматтарды вакциналау деңгейі туралы баяндамалар тыңдалды. Премьер-Министрдің орынбасары өңірлерге иммундау қарқынын төмендетпеуді тапсырды.

Сонымен қатар ВАК келушілердің мәртебесін тексермейтін «Ashyq» жүйесінің 12 мың жосықсыз қатысушыларын 2 аптаға жүйеден шығарып тастау туралы шешім қабылдады.

Ведомствоаралық комиссияның отырысын қорытындылай келе, Ералы Тоғжанов бірқатар нақты тапсырма беріп, ВАК қатысушыларының алдында таяу уақыттағы басым міндеттерді белгіледі.

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу