Қазақстанда Халықаралық ғылым мен коммерцияландыру жөнінде кеңес құрылады

15 тамыз 2016, 22:37
Фото: kazfin.kz

Қазақстанда Халықаралық ғылым мен коммерцияландыру жөнінде кеңес құрылады. Бұл туралы Дүниежүзілік банктің елдік менеджері Ералы Бексұлтанов ОКҚ баспасөз конференциясында мәлімдеді.

Халықаралық кеңес қазақстандық ғылым мен инновациялардың нәтижелілігін қолдауға және арттыруға бағытталған «Өнімді инновацияларды ынталандыру» жобасы аясында қалыптастырылады. Кеңес құрамына 7 ғалым мен халықаралық санаттағы сарапшылар және 2 ұлттық ғалым кіреді.

«Бұл кеңестің мақсаты жобалардың тәуелсіз және жоғары сапалы іріктеуін жүзеге асыру, олардың белгілі бір нәтижеге жетпейінше сүйемелдеп отыруды көздейді. Аталмыш кеңес біздіңше, өте қажетті консультативтік орган болады», - деді ол.

Халықаралық кеңестің қызметіне өтініштерді іріктеу мен ғылыми жобаларға мониторинг жүргізу кіреді. Сондай-ақ, кеңес ғылыми-жобалардың тиімділігі мен қорытындысын және коммерцияландыру мен олардың жүзеге асуын қамтамасыз етеді.

Е.Бексұлтан айтып өткендей, кеңес ҒЗТҚЖ коммерцияландыру бойынша үздік ұсынысты таңдауға мүмкіндік береді.

«Кеңес ҚР БҒМ-ін Қазақстандағы коммерцияландыру мен ғылымды дамыту саласы бойынша өзге де мәселелерге қатысты кеңес бере алады», - деп түйіндеді ол.