Әлихан Смайылов Біріккен Араб Әмірліктерінің делегациясымен кездесті

Қазақстан Премьер-Министрі Әлихан Смайылов БАӘ Орталық банкінің төрағасы Халед Мұхаммед Салем Балама бастаған Біріккен Араб Әмірліктері делегациясымен кездесті. 

Қатысушылар инвестиция тарту, екі елдің іскер топтарының байланыстарын нығайту және банк саласындағы ынтымақтастық мәселелерін талқылады.

Әлихан Смайылов таяудағы БАӘ-ге ресми сапарының қорытындысы бойынша екі ел арасында көптеген ведомствоаралық және коммерциялық құжаттарға қол қойылғанын, инвестициялық ынтымақтастықты одан әрі арттыру бойынша уағдаластықтарға қол жеткізілгенін еске салды.

«Біз өзара іс-қимылға үлкен маңыз береміз және екіжақты қарым-қатынастар деңгейін арттыруға ниеттіміз», — деді Премьер-Министр. 

Өз кезегінде Халед Мұхаммед Салем Балама қазіргі уақытта араб инвесторлары ынтымақтастық туралы ұсыныстарды егжей-тегжейлі зерделеп жатқанын, содан кейін оларды іске асыруға көшетінін атап өтті.

«Бүгін инвестициялық ынтымақтастық үшін жақсы мүмкіндіктер ашылып жатыр. Мен Қазақстан Үкіметіне осы бағытта көрсетіліп жатқан қолдау үшін алғысымды білдіргім келеді», — деді БАӘ Орталық банкінің басшысы. 

Айта кетейік, БАӘ делегациясының құрамында бұған дейін Қазақстанда инвестициялық жобаларды іске қосуға қызығушылық танытқан «Mubadala» және «ADQ» ірі компанияларының өкілдері де бар.

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу