Қазақстан Ресейден ірі қара мал жеткізуге уақытша шектеулер енгізді - ҚР АШМ

04 тамыз 2016, 19:53

Қазақстан Республикасы Ресей Федерациясынан ірі қара мал кіргізуіне уақытша шектеулер енгізді. Бұл туралы ҚР Ауыл шаруашылығы министрлігі мәлімдеді.

Мәлім болғандай, Ресей Федерациясының Ямало-Ненец округі аумағындағы сібір жарасының таралуы тіркелген. Бүгінгі күнге, Ресей Федерациясы бұқаралық ақпараттар құралдары аталған округте 2,3 мыңнан астам жануар қырылғанын және карантин енгізілгені туралы хабарлайды.

«Сібір жарасы» ауруы адамдар арасында тіркеліп, 90-ға жуық адам ауруханаға жатқызылды. 20 азаматта «сібір жарасы» диагнозы ресми түрде расталды.

Осыған орай, ү.ж. 3 тамызынан бастап Қазақстан Республикасы Ресей Федерациясынан ауыл шаруашылық жануарларды, жабайы жануарларды, осы жануарлардан алынған генетикалық материалдарын, шикізаты мен өнімдерін, мүйіз-тұяқ шикі затын (мүйіз, бұғы мүйізі, тұяқ), былғары шикізатын (жылқы, бұғы және жабайы жануарлар терісі) кіргізуіне уақытша шектеулер енгізді.

Бұдан басқа, Ресей Федерациясының аумағында (Астрахан облысы, Краснодар өлкесі, Ставрополь өлкесі, Қалмақ Республикасы, Ингуш Республикасы және Дағыстан Республикасы) нодулярлы дерматит ошақтарының тіркелуіне байланысты ҚР Ауыл шаруашылығы министрлігі 2016 жылғы 4 тамыздан бастап Ресей Федерациясынан Қазақстан Республикасына мүйізді ірі қара малы мен нодулярлы дерматитіне бейім басқа жануарларын, олардан алынған генетикалық материалдарын, олардың өнімін, сойылған мүйізді ірі қара малынан және басқа да нодулярлы дерматитіне бейім жануарларынан алынған өңделмеген тері шикізатын, ірі қара мал және басқа да нодулярлы дерматитіне бейім жануарларын асырау мен тасымалдауға арналған қолданыстағы болған құрал-жабдығын кіргізуіне және Қазақстан Республикасы аумағы бойынша транзитіне уақытша шектеулер енгізеді.