Премьер-Министрдің бірінші орынбасары Әлихан Смайыловтың төрағалығымен кеңес өтті, онда әлеуметтік маңызы бар азық-түлік тауарларының бағасы және нарықтағы бағаны тұрақтандыру бойынша шаралар сөз болды.

Қазақстан Республикасының Сауда және интеграция министрлігі ұсынған ақпаратқа сәйкес, әлеуметтік маңызы бар азық-түлік тауарларының бағалары жыл басынан бастап ағымдағы жылдың 4 мамырына дейін 4,8% көтерілді. Сонымен бірге сәуірде тауарлардың құны 1,7%-ға өсті.

Ең жоғары өсім Атырау облысында – 6,8%, Нұр-Сұлтанда – 6,3% және Шымкентте – 5,6% байқалды. Ең азы Алматы облысында – 4,0%, Қарағанды ​​облысында – 4,3% және Қызылорда облысында – 4,4% өсім байқалды.

Баға өсіміне негізінен күнбағыс майы, қант, тауық жұмыртқасы және көкөніс өнімдері сияқты кейбір азық-түлік бағаларының теңгерімсіздігі әсер етті. Премьер-Министрдің бірінші орынбасары картоп бағасының күрт қымбаттауына назар аударды.

«Жалпы көрініс көрсеткендей, Ауыл шаруашылығы министрлігі кейбір азық-түлік тауарларына бағаны тұрақтандыру үшін салалық шаралар қабылдауы керек», — деді Ә. Смайылов.

Естеріңізге сала кетейік, ағымдағы жылдың 11 наурызында Қазақстан Республикасы Үкіметінің отырысында 45 іс-шарадан тұратын әлеуметтік маңызы бар тауарларға бағаны тұрақтандырудың Жол картасы бекітілді. Осылайша, монополияға қарсы іс-қимылдың жедел шаралары қабылданды, баға шектерін енгізу, ауыл шаруашылығы жәрмеңкелерін өткізу, бағаны тұрақтандыру туралы меморандумдар жасау және бағаларға күнделікті бақылау ұйымдастырылды. Сонымен қатар, ЕЭК қант шикізатына кедендік баж салығы бойынша жеңілдік беру туралы шешім қабылдады және ірі қара мал мен ұсақ малдың аналық тұқымын экспорттауға шектеулер енгізді. Жол картасы бойынша қалған шаралар жүзеге асырылуда, өйткені олар заңнамалық мерзімдер мен белгілі бір рәсімдерді сақтауды талап етеді.

Сонымен бірге, жақын уақытта Сауда және интеграция министрлігі «Биржалық сауда туралы» заң жобасына жергілікті билік органдарының баға лимиттерін бекіту туралы шешімдерін келісу мерзімдерін қысқартуға қатысты түзетулер енгізуге бастамашы болады. Бұл заң жобасы Парламент Мәжілісінің қарауында.

12 мамырдағы Үкімет отырысында форвардтық сатып алуларды қаржыландыруды және «айналым схемасын» кеңейту мәселелері талқыланды. Осыған байланысты Ә. Смайылов әкімдіктерге мамыр айының соңына қарай форвардтық сатып алуды 10 млрд теңгеге дейін және «айналым схемасын» қаржыландыруды 50 млрд теңгеге дейін жеткізу туралы тапсырма берді.

«Үкімет отырысында 6 айдың қорытындысы бойынша әлеуметтік маңызы бар азық-түлік тауарларының бағасы мәселесін қарау жоспарланып отыр. Жол картасы негізінде тапсырыстарды «айналым схемасы» және форвардтық сатып алулар бойынша ерекше бақылауда ұстауды тапсырамын», — деп түйіндеді Ә. Смайылов.