2021 жылғы 28 маусым-4 шілде аралығындағы аптаның айшықты оқиғалары
1 шілде, бейсенбі күні Қазақстан Президенті Қасым-Жомарт Тоқаевтың төрағалығымен Реформалар жөніндегі жоғары кеңестің кезекті отырысы өтті. Жиында ұлттық жобалардың әзірленуі негізгі мәселе ретінде қарастырылды.
Дәл осы күні Президент «Астана» халықаралық қаржы орталығын басқару жөніндегі кеңестің кеңейтілген отырысын өткізді. Жиын барысында «Астана» халықаралық қаржы орталығының 2020 жылы атқарған жұмыстары қорытындыланды, сондай-ақ, оны әрі қарай дамыту жөніндегі ұсыныстар қарастырылды.
Дүйсенбі күні, 28 шілдеде ҚР Премьер-Министрі Асқар Мамин Қазақстанға жұмыс сапарымен келген Беларусь Республикасының Премьер-Министрі Роман Головченкомен келіссөз жүргізді. Үкімет басшылары сауда-экономикалық, ауыл шаруашылығы, энергетика, көлік-логистика, құрылыс салаларындағы ынтымақтастықтың, өнеркәсіптік кооперация мен білім берудің, сондай-ақ өңірлік өзара іс-қимылдың өзекті мәселелерін талқылады. Келіссөздер қорытындысы бойынша Беларусь Республикасына мұнай және мұнай өнімдерін жеткізу саласындағы сауда-экономикалық ынтымақтастық туралы үкіметаралық келісімге қол қойылды.
Сейсенбі, 29 шілде күні кезекті Үкімет отырысында санитариялық-эпидемиологиялық жағдай және білім беру объектілерінің қауіпсіздігін қамтамасыз ету мәселелері қаралды. Бірінші мәселені қарастыру кезінде Премьер-Министр А. Мамин Маңғыстау, Атырау, Батыс Қазақстан облыстарында вакциналау қарқынын күшейтуді тапсырды. Екінші мәселені қарау қорытындысы бойынша білім беру ұйымдарында балалардың қауіпсіздігін қамтамасыз ету жөніндегі жол картасын бекіту, девиантты мінез-құлықты балалармен жүргізілетін жұмыста мектеп психологтары мен кәмелетке толмағандар ісі жөніндегі инспекторлар жұмысын үйлестіруді күшейту тапсырылды.
Дәл осы күні А. Мамин Жаңғырту жөніндегі ұлттық комиссия отырысын өткізді. ҚР Тұңғыш Президенті – Елбасы Нұрсұлтан Назарбаевтың Бес институционалдық реформасын іске асыру жөніндегі «100 нақты қадам» ұлт жоспарының және Мемлекет басшысы Қасым-Жомарт Тоқаевтың 2020 жылғы 1 қыркүйектегі Қазақстан халқына арнаған жолдауының орындалу барысы қаралды.
Сәрсенбі күні ҚР Премьер-Министрі «Tyson Foods» халықаралық бизнес жөніндегі президенті Кристофер Лангхольцпен кездесу өткізді. Кездесуде Қазақстанда заманауи агро-мультипротеин индустриясын дамыту мәселелері талқыланды.
1 шілдеде А. Мамин Алматы қаласына жұмыс сапары аясында Үлкен Алматы айналма автомобиль жолының (ҮАААЖ) салыну барысын тексерді. Үкімет басшысы құрылыс-монтаждау жұмыстарының қарқынын арттыруды және барлық сапа стандарттарын қамтамасыз ете отырып, кестеден 2 жылға ертерек, жұмысты 2022 жылдың соңына дейін аяқтауды тапсырды.
2 шілде күні Премьер-Министр Алматы қаласына жұмыс сапары аясында қалалық метрополитеннің даму барысын тексерді. Қазіргі таңда метрополитеннің бірінші желісінің жұмыс істеп тұрған 9 метро станциясына қосымша «Сарыарқа», «Достық» және «Қалқаман» станциялары салынып жатыр.
Үкімет басшысы Алматы қаласына жұмыс сапары аясында «Алтын Орда» базары маңындағы көлік айрығы – «Алматы-Бішкек» автомобиль жолының 16-19 км учаскесін қайта жөндеу барысымен танысты. Жоба инженерлік коммуникацияларды қайта орната отырып, учаскені 4 жолақтан 10 жолаққа дейін кеңейтуді көздейді. Үкімет басшысы барлық сапа стандарттарын қамтамасыз ете отырып, жұмыс қарқынын арттыруды және оларды биыл қазан айында аяқтауды тапсырды.
ҚР Премьер-Министрі Асқар Мамин Алматы қаласына жұмыс сапары барысында Алматы агломерациясын дамыту мәселелері жөнінде кеңес өткізіп, онда биылғы 20 тамызға дейін «Үлкен Алматының» төрт пилоттық жобасын іске асыру мәселесін пысықтауды тапсырды.
Алматы қаласында ҚР Премьер-Министрі Еуразиялық даму банкі (ЕАДБ) кеңесінің отырысын өткізді, онда ЕАДБ-ның 2022-2026 жылдарға арналған стратегиясы бекітілді. ЕАДБ-ның күш-жігері «Еуропа-Батыс Қытай» көлік-цифрлық дәлізі, ЕАЭО+ бірыңғай тауар өткізу желісі және Орталық Азияның су-энергетика кешені сияқты ірі инвестициялық жобаларды іске асыруға бағытталатын болады.
3 шілде күні А. Мамин Елорда күніне арналған мерекелік іс-шараны дәстүрлі түрде ашатын Мемлекеттік ту көтеру салтанатты рәсіміне қатысты.
Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз