Қазақстан Республикасының Премьер-Министрі

Қосымшаны Android-қа жүктеп алу

Елбасы Astana Group компаниялар тобының президенті Н. Смағұловты қабылдады

07 ақпан 2019, 18:14
Фото: akorda.kz

Кездесу барысында Мемлекет басшысына отандық автомобиль өнеркәсібін одан әрі дамытуға байланысты тапсырмалардың орындалуы жөнінде мәлімет берілді. Бұл туралы Ақорданың баспасөз қызметі хабарлайды.

Нұрлан Смағұлов Нұрсұлтан Назарбаевқа «Астана Моторс» компаниясының Алматы қаласында Hyundai жеңіл көлігін жасау зауытының құрылысын бастағаны жөнінде баяндады.

«Кәсіпорынның қуаты алғашқы кезеңде 30 мың автомобиль шығаруға жетеді. Ал, келесі кезеңде өндіріс көлемі жылына 45 мыңға дейін артатын болады. Соның арқасында Қазақстан нарығын сапалы әрі қолжетімді Hyundai маркалы жеңіл автомобилімен қамтамасыз етуге, сондай-ақ көлікті ТМД елдеріне экспорттауға жол ашылады. Жобаға бөлінген инвестицияның жалпы көлемі – 25 млрд теңге. Бұған өз қаражатымыздан бөлек коммерциялық талаптарға сай заемдік қаржы тартылмақ. Зауыт 700 жаңа жұмыс орнын ашуға мүмкіндік береді», — деді Нұрлан Смағұлов.  

Кездесу соңында Н. Смағұлов Мемлекет басшысына Қазақстан бизнесіне тұрақты қолдау көрсетіп келе жатқаны және «7-20-25» ипотекалық тұрғын үй бағдарламасы сияқты көлік саласына несие бөлу бағдарламасы жөнінде шешім қабылдағаны үшін алғыс айтты. 


Қазақстан Премьер-Министрі мен Үкіметі жаңалықтарынан хабардар болыңыз — ресми Telegram-арнаға жазылыңыз