Төрт ақылы жол қазіргі қарқын сақталған жағдайда жылына 5,4 млрд тг жуық кіріс әкелуі мүмкін. Бұл туралы Үкімет алаңында өткен баспасөз конференциясы барысында индустрия және инфрақұрылымдық даму вице-министрі Қайырбек Өскенбаев айтып берді.

Қаңтарда жаңа автожолдарда (Астана — Теміртау, Алматы — Қапшағай және Алматы — Қорғас) төлем жүйесі енгізілді. Аталған кезеңде 147 млн теңге жиналды.

«Қазіргі қарқын бойынша жылына шамамен 5,4 млрд теңге жиналуы керек. Біз осы жолдар толығымен өзін-өзі қамтамасыз ететін болады деп көздеп отырмыз. Біздің есептеуімізше, бұл жолдарды және Бурабайға апаратын (Астана – Щучинск) жолды орта есеппен жыл сайынғы қамту 3,8 млрд теңгені құрайды. Аталған жүйе жақсы нәтижелер көрсетіп жатыр, келешекте біз осы жүйеге толығымен ауысамыз деп ойлаймын», — деді Қ. Өскенбаев.

Сонымен қатар, вице-министрдің айтуынша, Астана — Павлодар трассасы бойынша барлық жұмыстар биыл аяқталады.

«253 км жерде жұмыстар аяқталды, қалған бөлігі биыл толықтай ретке келтіріледі. Осы жылы аталған трассаны толықтай ашамыз», — деді Қ. Өскенбаев.

• 
• 
• 
•