Үкімет Құрылтайдың қарауына «Қазақстан Республикасының кейбір заңнамалық актілеріне ветеринария мәселелері бойынша өзгерістер мен толықтырулар енгізу туралы» заң жобасын ұсынды. Құжат қаралып, бірінші оқылымда мақұлданды.

Түзетулер ветеринария жүйесін жетілдіруге, сала мамандарының әлеуметтік қорғалуын арттыруға, эпизоотиялық тұрақтылықты және азық-түлік өнімдерінің қауіпсіздігін қамтамасыз етуге бағытталған. Саланы реформалау бес негізгі бағыт бойынша жүзеге асырылмақ:

• Ветеринария мамандарының әлеуметтік мәртебесін арттыру. Мамандарға кемінде екі лауазымдық жалақы мөлшерінде сауықтыруға арналған жәрдемақы төленетін жыл сайынғы ақылы еңбек демалысын беру, ғылыми дәрежесі үшін қосымша ақы қарастыру және арнайы киіммен қамтамасыз ету көзделген. Сондай-ақ мамандардың кәсіби құқықтары мен мүдделерін қорғау мақсатында ветеринариялық палата құру жоспарланып отыр.
• Мемлекеттік органдардың өкілеттіктерін межелеу. Жергілікті атқарушы органдардың, бейінді комитеттің, республикалық эпизоотияға қарсы отрядтың және ветеринариялық ұйымдардың функциялары айқындалады.
• Ветеринариялық препараттарға бақылауды күшейту. Олардың сапасын, қауіпсіздігін және ЕАЭО бірыңғай талаптарына сәйкестігін бақылау үшін фармацевтикалық инспекция құрылады.
• Саланы цифрландыру. Жануарларды есепке алу, ветеринариялық іс-шараларды тіркеу, бақылау және орын ауыстыратын объектілердің қадағалануын қамтамасыз ететін цифрлық жүйе енгізіледі.
• Ветеринариялық-санитариялық бақылауды күшейту. Ауыл шаруашылығы жануарлары мен жануарлардан алынатын өнімдер сатылатын сауда нысандарында тұрақты мемлекеттік бақылау жүргізу, сондай-ақ жануарларды сәйкестендіру және есепке алу талаптары қатаңдатылады.

Құжатта, әсіресе ауылдық жерлерде өзекті болып отырған кадр тапшылығы мәселесіне ерекше назар аударылған.

«Ветеринария мамандығының, әсіресе ауылдық жерлерде, тартымдылығының төмен болуы кадр тапшылығына, жұмыс істеп жүрген мамандарға түсетін жүктеменің артуына әкеліп, ветеринариялық іс-шаралардың уақтылы жүргізілуіне кері әсерін тигізуде», — деп атап өтті Аграрлық мәселелер, экология және табиғи ресурстар комитетінің төрағасы Серік Егізбаев.

Ұсынылып отырған шаралар ветеринария мамандығының тартымдылығын арттыруға және білікті мамандардың салада тұрақтап жұмыс істеуіне қосымша жағдай жасауға бағытталған.

Сонымен қатар Құрылтай отырысында экономиканың басым бағыттарын қаржыландыру жөніндегі Азия даму банкімен жасалған келісімді ратификациялау туралы заң екі оқылымда қабылданды.

 

#АӨК #Заң жобалары

• 
• 
• 
•