3 қазанда Үкімет үйінде Қазақстан Үкіметінің отырысы өтті.

• ҚР Премьер-Министрі Әлихан Смайыловтың төрағалығымен өткен Үкімет отырысында өңдеу өнеркәсібін дамыту мәселелері қаралды. Өнеркәсіп және құрылыс министрі Қанат Шарлапаев, «Бәйтерек» ұлттық басқарушы холдингі» АҚ басқарма төрағасының бірінші орынбасары Нұрболат Айдапкелов, Ақмола облысының әкімі Марат Ахметжанов, Ақтөбе облысының әкімі Асхат Шахаров және Ұлытау облысының әкімі Берік Әбдіғалиұлы баяндама жасады.

• Премьер-Министр кәсіпорындарда инновациялық технологияларды енгізудің жаңа тәсілдерін, ірі жобаларды инфрақұрылымдық және ресурстық резервтермен басым түрде қамтамасыз ету механизмін әзірлеу, сондай-ақ инвестиция тарту жұмыстарын өзектендіру қажеттігін атап өтті.

• Сондай-ақ отырыста жол қозғалысы қауіпсіздігі бойынша шаралар талқыланды. Мәселе бойынша ішкі істер министрінің бірінші орынбасары Марат Қожаев, көлік министрінің міндетін атқарушы Талғат Ластаев, ТЖМ басшысы Сырым Шәріпханов, Түркістан облысының әкімі Дархан Сатыбалды баяндама жасады.

• Үкімет басшысы жекеменшік таксидің, әсіресе қалааралық бағыттардағы такси қызметін реттеу жөнінде қосымша шаралар қабылдауды, көлік құралдарын техникалық тексеруден өткізу сапасын тиімді бақылау механизмін әзірлеуді, заң бұзушылықтарды тіркеу камераларының санын көбейту және трассалық медициналық-құтқару пункттерін дамыту, оның ішінде мобилді жылжымалы бригадалар құру жөнінде шаралар қабылдауды тапсырды.