Қазақстанның шағын және орта бизнесі тауар өндіру бойынша көшбасшылардың қатарына қосылды

Шағын және орта бизнес кәсіпорындары 2016 жылы жалпы сомасы 17 трлн теңгеге тауар өндірді. Бұл мұнай өндіру көрсеткіштерінен біршама асып түсті. Бұл туралы ҚР ұлттық экономика вице-министрі Руслан Дәленов хабарлады.

2016 жылы еліміздің ІЖӨ-дегі шағын және орта бизнес үлесі 23,1%-ды құрады. Сондай-ақ шағын және орта кәсіпорындарда 3 млн адам жұмыс істейді.

«Салыстырып айтар болсақ, бір жылда өндірілген шикі мұнай көлемі 7,2 трлн теңгені құрады. Мұнай елі деп осыны айт!», - деді Руслан Дәленов.

ШОК өнімін шығару халықтың жан басына шаққанда әр адамға 1 млн теңгені құрайды. Кәсіпорындардың көбісі Алматы мен Оңтүстік Қазақстан облыстарында шоғырланған.

Жалпы, еліміздің ІЖӨ 46 трлн теңгені құрайды. Халықтың жан басына шаққанда ІЖӨ – 2,6 млн теңге. ІЖӨ-нің 25%-дан астамы өнеркәсіпке тиесілі.