Қазақстанда 2029 жылға дейін тоғыз танымал әлемдік университеттің филиалдарын ашу жоспарланып отыр

ҚР Премьер-Министрі Әлихан Смайылов Азия университеттері альянсы (АУА) саммитінің аясында Астана қаласында өтіп жатқан ұйым президенттерінің форумына қатысты.

Саммит – Альянстың негізгі іс-шараларының бірі, сондай-ақ ғалымдар, зерттеушілер мен саясаткерлер жоғары білім беру саласындағы өзекті мәселелер мен даму үрдістерін талқылайтын платформа. Биыл Назарбаев Университеті қабылдаушы тарап болып отыр.

Премьер-Министр бұл іс-шара COVID-19 пандемиясы басталғаннан кейін Альянс университеттері басшыларының алғашқы жүзбе-жүз кездесуі екенін атап өтті.

«COVID-19 пандемиясы, технологиялық революция, жасанды интеллекттің дамуы және басқа да факторлардан туындаған әлемдегі қарқынды өзгерістер әртүрлі салаларда, әсіресе білім беру саласында инновациялық шешімдерге деген сұранысты арттыруда», — деді Әлихан Смайылов. 

Үкімет басшысы әлемдегі үрдістерді ескере отырып, Қазақстан 2027 жылға қарай ғылыми зерттеулерді қаржыландыру деңгейін ЖІӨ-нің 1%-на дейін жеткізуді жоспарлап отырғанын атап өтті. Сонымен қатар экономиканың барлық саласын қарқынды цифрландыру аясында Үкімет еңбек нарығына қажетті мамандарды тиісті деңгейде дайындау үшін жоғары оқу орындарының цифрлық архитектурасын қалыптастыру бойынша жұмыс жүргізуде.

Оған қоса беделді шетелдік университеттермен арадағы ынтымақтастық нығайып жатыр. Мәселен, төрт халықаралық ЖОО Қазақстан өңірлерінде өз филиалдарын ашты. Олардың арасында University of Arizona мен Heriot-Watt University бар. 2029 жылға дейін кем дегенде тағы тоғыз танымал университетті шақыру жоспарланып отыр.

«Қазіргі уақытта өңірлердегі қазақстандық университеттерді халықаралық деңгейдегі оқу орындарына айналдыру бойынша бастамалар іске асырылуда. Ол үшін оқу орындарын жабдықтау және зерттеу зертханаларын құру жұмыстары жүріп жатыр. Аталған орталықтар өңірлердегі стандартты көтеріп, академиялық және ғылыми дамуға ықпал ететін болады», — деді Әлихан Смайылов. 

Анықтама: Азия университеттерінің альянсы – мүше университеттердің академиялық және мәдени ынтымақтастығына ықпалдасу мақсатында 2017 жылы құрылған коммерциялық емес ұйым. Оның құрамына Азияның түкпір-түкпірінде орналасқан 15 жоғары оқу орны, атап айтқанда, Қытай, Жапония, Оңтүстік Корея, Тайланд және басқа елдердің жетекші университеттері кіреді.

#Әлихан Смайылов #ҚР Премьер-Министрі #Білім беру

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу