Нұр-Сұлтанда ынтымақтастық жөніндегі Қазақстан-Ресей конференциясы өтті

Бүгін Л.Н. Гумилев атындағы Еуразия ұлттық университетінде «Қазақстан және Ресей. ЕАЭО аясындағы ынтымақтастықтың өзекті бағыттары» конференциясы өтті.

Іс-шараға ҚР Премьер-Министрінің орынбасары – сауда және интеграция министрі Бақыт Сұлтанов, РФ Үкіметі Төрағасының орынбасары Алексей Оверчук, ҚР-дағы РФ Төтенше және Өкілетті елшісі Алексей Бородавкин, Л.Н. Гумилев атындағы ЕҰУ ректоры Ерлан Сыдықов және басқалар қатысты. 

Конференция барысында қатысушылар Қазақстан мен Ресейдің екіжақты форматтағы және көпжақты ынтымақтастық аясындағы әріптестігі әрі қарай нығайып келе жатқанын атап өтті. Дәстүрлі түрде Еуразиялық экономикалық одақ аясындағы ынтымақтастық ерекше орын алады. 

Премьер-Министрдің орынбасары – сауда және интеграция министрі Бақыт Сұлтановтың айтуынша, 2021 жылдың қорытындысы бойынша ҚР мен РФ арасындағы тауар айналымы 29%-ға өсіп, $24,2 млрд құрды. 

«Ковидтен кейінгі кезеңге қарамастан, біз екі ел арасындағы сауда көрсеткіштерінің ең жоғары мәндеріне қол жеткіздік. Бүгінгі таңда ресейлік компаниялар Қазақстан экономикасына салынған қаражат көлемі бойынша негізгі инвесторлардың бестігіне кіреді ($16,5 млрд). Жалпы Қазақстандағы ресейлік әріптестермен өзара іс-қимыл жасай отырып, 13 маңызды бірлескен жоба іске асырылды. Бірқатар негізгі салаларда $4 млрд-қа жуық тағы 20 ірі жоба іске асырылып немесе пысықталып жатыр», — деді Бақыт Сұлтанов.

 ЕАЭО жұмыс істеген кезден бастап Қазақстан үшінші елдер мен Одақ елдерінің нарықтарына өңдеудің жоғары және орташа дәрежесі бар тауарлардың экспортын елеулі түрде ұлғайтқанын атап өткен жөн. Мысалы, одақ жұмыс істеген кезеңде қазақстандық өңделген өнімнің ЕАЭО-ға экспорты 64,3%-ға өсті. Жалпы ҚР-ның ЕАЭО елдеріне экспорты 55,1%-ға өсті. 

«Сондай-ақ ЕАЭО аясында техникалық реттеу саласында кәсіпкерлер өнім қауіпсіздігіне қойылатын қосымша талаптарды орындаудан, сәйкестікті бағалаудың артық рәсімдерін жүргізуден босатылды. Бүгінде ЕАЭО-ның басқа төрт елінде еркін сауда жасау үшін ЕАЭО елдерінің бірінен бірыңғай нысан бойынша сәйкестік сертификатын алу жеткілікті», — деді Бақыт Сұлтанов. 

Еске сала кетейік, биыл — Қазақстан-Ресей ынтымақтастығы үшін мерейтойлық жыл. Қазан айында екі ел дипломатиялық қатынастардың орнағанына 30 жыл толуын атап өтеді.

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу