ҚР Премьер-Министрі АЭФ аясында Македонияның үкімет басшысымен кездесу өткізді
Бүгін ҚР Премьер-Министрі Серік Ахметов VI Астана экономикалық форумы аясында Македонияның Премьер-Министрі Никола Груевскимен кездесті.
Кездесу барысында тараптар сауда-экономикалық саладағы екіжақты ынтымақтастықты дамытудың қазіргі жайы мен перспективасын талқылады.
Македонияны Балқан түбегіндегі маңызды әріптес деп атаған Қазақстан Үкіметінің басшысы «Екі елде де өзара тиімді экономикалық іс-қимылды дамыту, көлік-транзит, энергетика салаларындағы байланыстарды кеңейту, экономиканың түрлі салаларында бірлескен кәсіпорындар құру үшін үлкен әлеует бар», - деді.
Осыған орай С.Ахметов «екіжақты ынтымақтастықтың басымдықты бағыттарын анықтайтын «Жол картасын» қалыптастыру бойынша жұмыс тобын құруды ұсынды».
Н.Груевский Қазақстан Премьер-Министрінің пікірін қуаттай отырып, «Қазақстан мен Македония ынтымақтастығының бұдан да жоғары сапалы деңгейге көтерілуге мүмкіндіктерінің зор екенін» айтты.
Македонияның Премьер-Министрі өзінің қазақстандық әріптесін өз еліне сапармен келіп қайтуға шақырды.
Қазақстанның Премьер-министрі мен Үкіметі жаңалықтарынан хабардар болыңыз — ресми Telegram-каналға жазылыңыз
