Emblem
Қазақстан Республикасы
Премьер-Министрінің
ресми ақпараттық ресурсы
Menu
Emblem
Close button

«Алтын сапа», «Парыз» және «Қазақстанның үздік тауары»: ҚР үздік кәсіпорындарын марапаттау рәсімі қалай өтті

Жұма, 13 Желтоқсан 2019, 18:45:40

Қазақстан астанасында Тәуелсіздік күніне орай ҚР Президентінің «Алтын Сапа» сыйлығының жеңімпаз-лауреаттары және «Қазақстанның үздік тауары» республикалық көрме-байқауының дипломанттары, сондай-ақ «Парыз» бизнестің әлеуметтік жауапкершілігі бойынша жыл сайынғы республикалық байқауы, «ALTYN OIMAQ» дизайнерлердің ұлттық байқауы, «Бизнес Кемелділік», «ІСКЕР», «ҰЛЫ ДАЛА ЕЛІ» байқауларының жеңімпаздарын марапаттаудың салтанатты рәсімі өтті.

Шара Қазақстан Президенті Қасым-Жомарт Тоқаевтың, Премьер-Министр Асқар Маминнің, «Атамекен» ҚР ҰКП Төралқа Төрағасы Тимур Құлыбаевтың, ҚР индустрия және инфрақұрылымдық даму министрі Бейбіт Атамқұловтың, сонымен қатар ҚР Парламенті депутаттарының, орталық мемлекеттік органдар және республикадағы кәсіпорындар басшыларының қатысуымен өтті.

ҚР индустрия және инфрақұрылымдық даму министрі Б. Атамқұлов екінші индустриялық бесжылдықтың қорытындылары және 2020-2025 жылдарға арналған Индустриялық-инновациялық дамудың мемлекеттік бағдарламасын (ИИДМБ) іске асыру жоспарлары туралы баяндады.

Министрдің айтуынша, Бағдарламаны іске асыру жылдары өңдеу өнеркәсібі кәсіпорындары 43 трлн теңгеге өнім шығарған. 2018 жылдың қорытындысы бойынша саланың еңбек өнімділігі $35,3/адамға жеткен. Аталған кезеңде саланың негізгі капиталына инвестициялар ағыны 4,5 млрд астам теңгені құраған. 

«Қазақстандық кәсіпорындар $70 млрд сомасына өңдеу өнеркәсібінің өнімдерін экспорттады (2015 жылдан бастап 2019 жылдың 10 айына дейін). 2015 жылдан бастап инвестициялар көлемі шамамен 5 трлн теңге болатын Индустрияландыру картасының 500-ден астам жаңа индустриялық жобасы енгізілді. Бағдарлама өңдеу өнеркәсібінің негізгі салаларының дамуын жаңа деңгейге шығарды», — деді Б. Атамқұлов.

Мәселен, металлургияда өндіріс көлемі 2,2 есеге артты. Соның нәтижесінде, салада экспортқа бағытталған жаңа тауарлар пайда болды — бұл алюминий профильдері, автомобиль дискілері, ферросилиций.

Индустрияландырудың екінші бесжылдығы аясында машина жасау саласындағы өнім көлемі 1,2 есеге ұлғайып, саладағы автомобиль өнеркәсібінің үлесі 26% дейін артты. Мұнымен қоса, шығарылатын өнімдер қатары да кеңейтілген, атап айтсақ: инфокоммуникациялық жабдық, модемдер, бұрандалы сорғылар, жарықтандыру құрылғылары мен электр қуатын таратқыш аппаратура, орталық ауа баптағыштар. Экспортқа бағдарланған тоңазытқыш вагондардың өндірісі жолға қойылды.

Қазақстан қуаттылығы 500 мегаваттқа жететін аса қуатты трансформаторлар өндірісін Орталық Азияда алғашқы болып қолға алды. Химия өнеркәсібі, фарминдустрия, жеңіл өнеркәсіп қарқынды түрде дамып жатыр.

«Индустрияландыру құзіреттілікті дамытуға, қосылған құны жоғары өнім шығаруға мүмкіндік беріп, ел экономикасының тұрақтылығын қамтамасыз етуге септігін тигізеді. Біз барлық сыртқы экономикалық күйзелістерді жоспарлы түрде еңсеріп, ел дамуының жаңа траекториясын айқындадық. Индустрияландырудың екі кезеңі артта. Қателіктеріміз мен жинаған тәжірибемізді ескеріп, өзіміз таңдаған еңбек өнімділігін арттыруға, өнімдерімізді сыртқы нарықтарға шығаруға бағдарланған бағытымызды жалғастырамыз», – деді министр.

2020 жылдан бастап Индустрияландырудың үшінші бесжылдығының Бағдарламасын іске асыру бастау алады, онда негізгі басымдық — жоғары технологиялы өнімдер экспортының номенклатурасын кеңейтуге бағытталған индустриялық кәсіпкерлікті дамыту, сондай-ақ өндіріске еңбек өнімділігінің өсіміне ықпал ететін цифрлық технологиялар мен инновацияларды енгізу болады.

Бағдарламаның негізгі тәсілдері анықталған:

  • Бірінші, ішкі нарықты сапалы өніммен қанықтыруға және экспортқа шығаруға бағдарланған өңдеу секторының тиімді кәсіпорындарына баса назар аударылған; 

  • Екінші, мемлекеттік қолдаудың жеке-жеке құралдарынан дамуды кешенді ынталандыруға көшу;

  • Үшінші, бизнестің қарсы міндеттемелері мен жауапкершіліктерін қабылдау;

  • Төртінші, салалық қағидаттан нақты басымдықты тауарларды анықтауға көшу;

  • Бесінші, құнды қалыптастырудың жаһандық тізбегін проактивті құруға баса назар аудару.

Б. Атамқұловтың айтуынша, осы ретте қазіргі таңда отандық тауарлардың әлеуетін анықтауға бағытталған тиісті талдау жұмыстары жүргізіліп жатыр. Бұдан кейін ірі трансұлттық компаниялар Қазақстанға тікелей тартылады деп жоспарланған. 

Бағдарламаны іске асыру өңдеу өнеркәсібіндегі келесі нәтижелерге қол жеткізуге жол ашады:

  • еңбек өнімділігін $56 мың/адамға арттыру;

  • экспорт көлемін 2025 жылы $30 млрд-қа дейін өсіру;

  • негізгі капиталға салынған ивнестицияларды – 9,3 трлн теңгеге дейін ұлғайту.

Марапаттауға қайта оралсақ, ҚР Президентінің «Алтын Сапа» сыйлығының екі жүзден астам үміткері ішінен сарапшылық комиссия 14 бизнес субъектісін үш категория және 4 аталым: «Өндірістік мақсаттағы үздік кәсіпорын», «Халыққа арналған тауарларды шығаратын үздік кәсіпорын», «Қызмет көрсететін үздік кәсіпорын», «Азық-түлік және/немесе ауыл шаруашылығы өнімдерін шығаратын үздік кәсіпорын» номинациялары бойынша іріктейді.

Сонымен қатар «Қазақстанның үздік тауары» республикалық көрме-байқауының жеңімпаздарына: «Өндірістік мақсаттағы үздік тауарлар», «Халыққа арналған үздік тауарлар», «Үздік азық-түлік тауарлары» үш аталым бойынша марапаттар табысталды. 

Салтанатты іс-шара аясында Қазақстанда алғаш рет өткен «ALTYN OIMAQ» киім дизайнерлерінің ұлтттық байқауының жеңімпаздары марапатталды. Жеңімпаздар 6 аталым бойынша анықталды: «Ұлттық ою-өрнекпен көмкерілген іскерлік киімнің үздік дизайны», «Ұлттық ою-өрнекпен көмкерілген спорт киімнің үздік дизайны», «Ұлттық ою-өрнекпен көмкерілген балалар киімінің үздік дизайны», «Ұлттық ою-өрнекпен көмкерілген үйге арналған текстильдің үздік дизайны», «Ұлттық ою-өрнекпен көмкерілген аксессуардың үздік дизайны», «Спорт аяқ киімінің үздік дизайны».

Сонымен қатар, іс-шара аясында алдағы индустриялық бесжылдыққа жаңа бағыттар жарияланды, атап айтқанда тиімді кəсіпорындарды ынталандыру, саланың басымдылығынан нақты жəне орташа өңдеудің нақты тауарларын анықтауға көшу, мемлекеттік ынталандыруы бар кəсіпорындарға кері міндеттемелер енгізу, сондай-ақ əлемдік құн тізбегіне белсенді интеграциялау.

«Азық-түлік тауарларын және/немесе ауыл шаруашылығы өнімін шығаратын үздік кәсіпорын» номинациясы бойынша «Мағжан және К» ЖШС (Қызылорда обылсы), «МИЛХ» ЖШС (Қостанай облысы), «Good Look» сауда үйі» ЖШС (Жамбыл облысы) жеңімпаз атанды. 

Жеңімпаз атанған «Мағжан және К» компаниясы биыл күріштен рекордтық өнім алды: 90 мың гектарға жуық егістік алқаптан 530 мың тонна күріш. Компания директоры Дархан Ерәлиев бұл Елбасының ауыл шаруашылығын қолдауға бағытталған нақты тапсырмаларын іске асырудың арқасында мүмкін болғанын айтты.

«Елбасының өңірдің күріш саласын дамытуға қосқан үлесі өте зор. Ең тиімді шара минералды тыңайтқыштарға, жоғары өнімді тұқымдарға, жанар-жағар май материалдарына жеңілдетілген субсидиялардың бөлінуі болды. Осылайша, біз әр гектардан 70 центнер күріш алып, рекордтық деңгейге жеттік, 3 қайта өңдеу зауытын ашып, өніміміздің 60%-ын шет елдерге экспорттап жатырмыз. Сонымен қатар, жергілікті “Сыр сұлуы” және “Айгерім” күріш сұрыптарын өсіре бастадық. Осындай жоғары марапатты алу үшін сапалы жұмыс жасау керек. Біз шаруашылықта ең жаңа технологияларды қолдануға тырысамыз. Бұл марапат бізді жаңа жетістіктерге жетелейді», — деді Д. Ерәлиев.

«Қызмет көрсететін үздік кәсіпорындар» болып «ТрансАвиа» ЖШС (Алматы қаласы), «Caspian engineering&research» ЖШС (Маңғыстау облысы), «KAZTECHNOLOGY инжиниринг компаниясы» ЖШС (Нұр-Сұлтан қаласы) танылды.

«ТрансАвиа» ЖШС бас директоры Виктор Матвеев компанияның бұл марапатты алу үшін 20 жылдай қызмет еткенін айтты.

«Біз осындай жоғары көңіл үшін алғыс айтамыз. Біз туризм саласында қызмет көрсетумен айналысамыз. Бұл – кәсіпорын мен мемлекеттің мүдделері Қазақстандағы туристік индустрияны дамыту аясында тоғысқан жағдай. Компанияның ерекшелігі, біз Қазақстанның барлық аймақтарында бармыз. Біз елімізде тревел-индустрияда және шетелде қызмет көрсететін жалғыз компаниямыз. Біздің Қазақстанда, Беларусьте және Украинада филиалдарымыз бар. Мемлекет кәсіпкерлерді қолдайды, бұл бизнесті жеңіл дамытуға мүмкіндік береді», — деді В. Матвеев.

«Халыққа арналған тауарлар шығаратын үздік кәсіпорын» атағын «KПK ZETA» ЖШС (Алматы облысы), «Құдайбергенов Ф. Т.» ЖК (Түркістан облысы), «Роза киіз илеу комбинаты» ЖШС (Шығыс Қазақстан облысы) алды.

Іс-шара кулуарында «KПK ZETA» компаниясының бас директоры Мақсұт Омарбаев компания 24 жылда алғаш рет «Алтын сапа» сыйлығын алуға конкурсқа қатысқанын атап өтті.

«Тәуелсіздік күні қарсаңында “Алтын сапа” сыйлығының лауреаты болу біз үшін үлкен мәртебе. Біз 4 мыңнан астам өнім түрін шығарамыз. Польша, Ресей, Тәжікстан, Өзбекстан, Қырғызстан, Грузия елдеріне тауарларды экспорттаймыз. Бұл жиһаз ғана емес, сонымен қатар пластиктен жасалған бұйымдар. Біз жұмысшыларды өзіміз дайындаймыз және олар бізде қалады. Егер 1996 жылы бізде 50 адам болса, биыл 2,5 мың адам жұмыс істейді. Біздің басты міндетіміз — не істей алатынымызды көрсету. Сондықтан алдағы уақытта да осындай сыйлықтарға ұсыныламыз», — деді М. Омарбаев.

«Өндірістік мақсаттағы үздік кәсіпорын» төртінші номинациясында «Алматы ауыр машина жасау зауыты» АҚ (Алматы қаласы), «Орал трансформатор зауыты» ЖШС (Батыс Қазақстан облысы), «АZАМ-КС» ЖШС (Ақмола облысы) жеңімпаздар атанды.

«Орал трансформатор зауыты» ЖШС басқарма төрағасы Олжас Есіркеповтің айтуынша, өндіріс бес жыл бұрын бастау алған.

«Орал трансформатор зауыты 2014 жылы Индустрияландыру күні іске қосылды. Бүгінде зауыт ойдағыдай жұмыс істеп тұр және үлгілі кәсіпорындардың бірі. Шығарылатын өнімнің 96%-ы ТМД елдеріне экспортталады. 2019 жылы 10 мың трансформатор экспортталды. Зауытта еуропалық брендтердің соңғы буын жабдықтары орнатылған. Келешекте өндірісті 30%-ға арттыруды жоспарлап отырмыз», — деді О. Есіркепов.

«АZАМ-КС» ЖШС өкілі Аязбек Мусиннің айтуынша, кәсіпорын астық өңдейтін жабдықтар шығарумен айналысады.

«Біздің кәсіпорнымыз шетелдік және басқа аналогтардан сапасы мен техникалық сипаттамасы бойынша төмен түспейтін өнімдер шығаратын Қазақстандағы жалғыз кәсіпорын. Біз астықты қайта өңдейтін жабдықтар шығарумен айналысамыз. Біз үшін бұл марапат – өте үлкен жетістік, бұл біздің бүкіл ұжымның жетістігі. Біз бұл жолда жеті жылдай еңбек еттік. Біздің компания да осыншама жыл қызмет істеп келеді. Бізді “Атамекен” ҰКП, ҚР Президентінің атап өткеніне өте ризамыз», — деді А. Мусин.

Сондай-ақ, «Үздік индустриялық жоба» және «Үздік инновациялық жоба» арнайы сыйлықтары «Бёмер Арматура» ЖШС (Қарағанды облысы) және «СКЗ-U» ЖШС (Қызылорда облысы, Жаңақорған ауылы) берілді.

Арнайы сыйлық иелері марапатты Қазақстан Республикасының Президенті Қасым-Жомарт Тоқаевтың қолынан алды.

Іс-шара аясында Қазақстанда алғаш рет өткен ALTYN OIMAQ дизайнерлер байқауының жеңімпаздарына марапаттар тапсырылды. Бір қызығы, номинациялардың бірін 10 жасар қыз жеңіп алды. Ұлттық ою-өрнек элементтері бар балалар киімінің ең үздік дизайны үшін марапат Айгерім Мұратқызына табысталды. Қыздың анасы Айнагүл Мазинова қызының дизайнерлер байқауына қатысуы туралы айтып берді.

«Осы жылдың наурыз айында біз өз жұмысымызды “Атамекен” ҰКП жариялаған конкурсқа жібердік. Айгерім әлі 16 жасқа толмағандықтан, мен “Ai Kerim style and design» фирмасының негізін қалаушы ретінде қызымның жұмыстарын өзімнің атымнан жібердім. Қазылар алқасы оның жұмысын өте жақсы бағалады. Айгерім жеңді деп айтқан кезде біз сенбедік. Бүгін жетекші дизайнерлермен қатар менің қызым да наградаға ие болды», — деп А. Мазинова өз әсерлерімен бөлісті.

Дизайнер Алина Данилова марапатты Премьер-Министр Асқар Маминнің қолынан алды. Оның жұмыстары «Ұлттық ою-өрнек элементі бар спорттық киімнің үздік дизайны» номинациясында үздік деп танылды. А. Данилова аталған жоба оны өзі таңдаған бағыттың дұрыстығына сендіргенін айтты.

«Байқау маған өз бағытымды таңдауға деген сенімділікті арттырды, енді мен үлкен арманымның біз ойлағаннан әлдеқайда жақын екенін білемін», — деп бөлісті дизайнер.

ALTYN OIMAQ дизайнерлер байқауының барлық жеңімпаздары:

  • Ұлттық ою-өрнекпен көмкерілген балалар киімінің үздік дизайны — Айнагүл Мазинова;
  • Спорт аяқ киімінің үздік дизайны — Айбибі Әбуова;
  • Ұлттық ою-өрнекпен көмкерілген үйге арналған текстильдің үздік дизайны — Евгения Жандарбаева;
  • Ұлттық ою-өрнекпен көмкерілген іскерлік киімнің үздік дизайны — Эльмира Битуреева;
  • Ұлттық ою-өрнекпен көмкерілген аксессуардың үздік дизайны — Сәкен Қаржаубаев;
  • Ұлттық ою-өрнекпен көмкерілген спорт киімнің үздік дизайны — Алина Данилова.

«Бизнес Кемелділік» – «Деловое совершенство» халықаралық сыйлығымен «Адили» ЖШС, «ТемірМаш» Павлодар зауыты» ЖШС марапатталды. 

«Айсберг ПВ» ЖШС, «Нәтиже» Сүт Фабрикасы» ЖШС, «Шахтерское» ЖШС, «Семирамида» тігін фирмасы» ЖШС, «Grand Miks» ЖК, «Байтемирова Р.С.» ЖК, «СКФ Отделстрой» ЖШС, «Уразбаева А SU_KZ» ЖК, «Дана-Дель» ЖК, «Султанов С.Т.» ЖК «ІСКЕР» сыйлығын алды.

«Уразбаева А SU_KZ» ЖК директоры Айсұлу Оразбаева да журналистермен өз әсерімен бөлісті.

«Бүгін бізде керемет іс-шара өтіп жатыр. Үкіметке, “Атамекен” ҰКП-ға бізді, жеке кәсіпкерлерді, қолдағаны үшін өте ризамын. Бүгін “Іскер” сыйлығына ие болғаныма қуаныштымын. Бұл біздің алдағы жұмысымызға үлкен серпін береді. Біз Қазақстанның одан әрі дамуына, сондай-ақ әйелдер кәсіпкерлігінің дамуына үлкен ынтамен жұмыс істеуге дайынбыз. Біздің кәсіпорын халық үшін жұмыс істейді. Біз халықты қолжетімді бағамен әдемі киіндіргіміз келеді», — деді А. Оразбаева.

«Дана-Дель» компаниясының директоры Бақытгүл Тоқтабаева марапат компанияны жаңа жетістіктерге жетуге ынталандыратынын атап өтті. 

«Біз бірінші рет, бірінші жылы “Іскер” сыйлығының жеңімпазы атандық. Бұл біз үшін үлкен жеңіс, бұл компаниямызды одан әрі жеңістер мен табыстарға жетелейді. Бұл зор перспектива. Біз бүкіл Қазақстан үшін сахналық киімдер шығарамыз. Биыл сахналық киім тігу бойынша ұсынылдық. 2018 жылдан бастап компания Ресей мен Италияға экспорт жасай бастады», — деді Б. Тоқтабаева.

«ҰЛЫ ДАЛА ЕЛІ» қолшатыр бренді сыйлығының жеңімпаздары: «Абай Дәулет» ЖШС, «Премиум Ойл Транс» ЖШС, «GOOD LOOK сауда үйі» ЖШС.

2019 жылы «Қазақстанның үздік тауары» атағына ие болғандар:

  • «Өндірістік мақсаттағы үздік тауарлар» номинациясында: «Шыныпластикалық құбырлары зауыты» ЖШС, «БатысАльянсСтрой» ЖШС, «Глобал Спецодежда» өндірістік бірлестігі» ЖШС;

  • «Халыққа арналған үздік тауарлар» номинациясында: «ПЭРИ» ЖШС, «AГФ групп» ӨК» ЖШС, «MARAI E7 Group» ЖШС;

  • «Үздік азық-түлік өнімдері» номинациясы бойынша: «ВИЗиТ алкогольсіз сусындар зауыты» ЖШС, «Қазетөнімі» ЖШС, «DALA-FRUIT.KZ» ЖШС.

Сонымен қатар іс-шара аясында «Парыз» бизнестің әлеуметтік жауапкершілігі бойынша республикалық байқауының жеңімпаздары марапатталды. Байқауды Қазақстан Республикасы Еңбек және халықты әлеуметтік қорғау министрлігі 2008 жылдан бері өткізіп келеді және 4 номинациядан тұрады: «Үздік әлеуметтік жауапты кәсіпорын», «Еңбекті қорғау саласындағы үздік кәсіпорын», «Үздік ұжымдық келісімшарт» және «Экологияға қосқан үлесі үшін». Әрбір номинация бойынша шағын, орта және ірі кәсіпкерлік субъектілері санаты бойынша үш сыйлық беріледі.

Биыл байқауға қатысуға 446 өтінім келіп түсті, соның ішінде: 141 кәсіпорын – ірі кәсіпкерлік субъектісі, 305 кәсіпорын – шағын және орта кәсіпкерлік субъектісі.

Байқау қорытындысы бойынша республикалық комиссия 25 жеңімпазды анықтады.

«Парыз» ұлттық байқауындағы жылдың ең әлеуметтік жауапты компаниясы ретінде ERG (Еуразиялық топ) танылды.

Шара кулуарында Eurasian Resources Group директорлар кеңесінің төрағасы Александр Машкевич жеңіс туралы өз әсерімен бөлісті.

«Бұл біздің бірінші марапатымыз емес, және соңғысы емес деп үміттенеміз. Біз алға ұмтыламыз, бір орында тоқтап қалмаймыз және компаниямыздың әрдайым жақсырақ бола түсуіне тырысамыз. Біз өзіміздің марапатымызды мақтан тұтамыз, біз ең үздік әлеуметтік жауапты кәсіпорынбыз, адамдардың болашаққа сенімді екенін, олар үшін өмір сүру деңгейін құрайтын пакет бар екенін және олар оны лайықты деп санайтынын көреміз. Біз адамдар, ауруханалар, демалыс, жұмыс жағдайлары туралы ойлаймыз. Біз үшін бұл дұрыс жолда екенімізді көрсететін үлкен өлшемдер», — деді А. Машкевич.

«Үздік әлеуметтік жауапты кәсіпорын» номинациясында ірі кәсіпкерлік субъектілері арасында Қызылорда облысынан «Абзал және К» ТС, Қарағанды облысынан «Ютария» ЖШС және Ақтөбе қаласынан «Ақтөбе рельс-арқалық зауыты» ЖШС лауреат атанды. Орта және шағын кәсіпкерлік субъектілері арасында: Солтүстік Қазақстан облысынан «Ильинское» ЖШС, Ақмола облысынан «Темірлан» ЖШС және Павлодар қаласынан «Павлодар политехникалық жоғары колледжі» ЖШС.

«Еңбекті қорғау саласындағы үздік кәсіпорын» номинациясында ірі кәсіпкерлік субъектілері арасында лауреаттар: Алматы қаласынан «С. М. Киров атындағы машина жасау зауыты» АҚ, Маңғыстау облысынан «Каz М-I» ЖШС және Шығыс Қазақстан облысынан «Силикат» ЖШС. Орта және шағын бизнес субъектілері арасында: Маңғыстау облысынан «Мұнайгазқұрылыс» ЖШС, Қарағанды облысынан «АлбаСтройДор» ЖШС және Атырау облысынан «Сапа Строй Сервис және К» ЖШС.

«Үздік ұжымдық шарт» номинациясында ірі кәсіпкерлік субъектілері арасында лауреаттар: БҚО-дан «Ақсайгазсервис» АҚ, Қостанай облысынан «Қостанай минералдары» АҚ және Нұр-Сұлтан қаласынан «Локомотив құрастыру зауыты» АҚ. Орта және шағын кәсіпкерлік субъектілері арасында: Ақмола облысынан «Поиск» агрофирмасы» ЖШС, Қостанай облысынан «Қарқын» агрофирмасы» ЖШС және Қызылорда облысынан «Жаңақорған шипажайы» АҚ.

«Экологияға қосқан үлесі үшін» номинациясында ірі кәсіпкерлік субъектілерінің лауреаттары: Қызылорда облысынан «Байкен-U» ЖШС, Шығыс Қазақстан облысынан «АЭС Өскемен ГЭС» ЖШС және Алматы облысынан «Филипп Морис Қазақстан» ЖШС. Орта және шағын бизнес субъектілері арасында: Батыс Қазақстан облысынан «Орал сауда-өнеркәсіптік компаниясы» ЖШС, Жамбыл облысынан «Амангелді газ» ЖШС және Солтүстік Қазақстан облысынан «Изолит» ЖШС.

Директорлар кеңесінің төрағасы Фаррух Махмудов «Ақсайгазсервис» АҚ өзінің өндірісі мен қызметін кеңейтіп қана қоймай, сонымен бірге Батыс Қазақстан облысы, Бөрілі ауданы тұрғындарының өміріне де, әлеуметтік ұжымдық өмірге де әлеуметтік жауапкершілік үлесін арттырып жатқанын атап өтті.

«Бұл марапат компанияның басшылығының бастауымен біздің ұжымның еңбегі, ол өз қызметкерлеріне ғана қамқор болып қоймай, күн сайын аймақтағы әлеуметтік мәртебе туралы ойлайды, адамдарға қамқорлық жасайды: халық қалай өмір сүріп жатыр, денсаулығы қалай екенін қарайласады, демалыста бос уақытты өткізуін қамтамасыз етеді. Компанияда көптеген адамдар жұмыс істейді. Өңір шалғайда орналасқан. Адамдар сол жерде өмір сүріп, дамуға қызығушылық таныту үшін жақсы өмірді қамтамасыз ету керек. Олар мектепке дейінгі мекемелермен, мектептермен, ауруханалармен, санаториймен қамтамасыз етілген», — деді Ф. Махмудов.

«Амангелді газ» ЖШС бас директоры Еркен Қасеев өз әсерлерімен бөлісті.

«Біз жеңеміз деп күткен жоқпыз. Біз сауалнаманы толтырдық, өткен аптада олар бізге қоңырау шалып, байқаудың лауреаты екенімізді айтты. Біз өте қуаныштымыз, өйткені біздің ұжым газды үздіксіз, апатсыз жеткізуге және өндіруге ерекше назар аударады. Біз “Парыз” сыйлығын қоршаған ортаға қосқан үлесіміз үшін алдық, менің ойымша, бұл лайықты түрде берілді, өйткені біз экологияны қорғауға аса мән береміз. Бүгінгі таңда біз жылына 350 млн текше метрден астам газ өндіреміз», — деді «Амангелді Газ» ЖШС бас директоры Еркен Қасеев.

Анықтама:

Қазақстан Республикасы Президентiнiң 2006 жылғы 9 қазандағы №194 Жарлығына сәйкес «Алтын сапа» сыйлығын алу байқауы төрт аталым: «Өндірістік мақсаттағы үздік кәсіпорын», «Халыққа арналған тауарларды шығаратын үздік кәсіпорын», «Қызмет көрсететін үздік кәсіпорын», «Азық-түлік және/немесе ауыл шаруашылығы өнімдерін шығаратын үздік кәсіпорын» бойынша өтеді.

Әр аталым бойынша шағын, орта және ірі кәсіпкерлік субъетілері категориялары бойынша беріледі.

«Алтын сапа» байқауына 216 кәсіпорын өтінім берді, соның ішінде 107 кәсіпорын ғана тиісті құжаттарды өткізе алды. 107 кәсіпорын ішінде: шағын кәсіпкерлік субъектілері – 39 кәсіпорын, орта кәсіпкерлік субъектілері – 44 кәсіпорын, ірі кәсіпкерлік субъектілері – 24 кәсіпорын. 

«Өндірістік мақсаттағы үздік кәсіпорын» аталымы бойынша – 35 өтінім, «Халыққа арналған тауарларды шығаратын үздік кәсіпорын» аталымы бойынша – 17 өтінім, «Қызмет көрсететін үздік кәсіпорын» аталымы бойынша – 35 өтінім, «Азық түлік және/немесе ауыл шаруашылығы өнімін шағыратын үздік кәсіпорын» аталымы бойынша – 20 өтінім түсті. 

2018 жылдан бастап, Қазақстан Республикасы Президентінің Жарлығымен «Алтын Сапа» сыйлығын алу байқауы және «Қазақстанның үздік тауары» республикалық көрме-байқауында «Үздік индустриялық жоба», «Үздік инновациялық жоба» арнайы сыйлықтары тағайындалды.

Байқаудың «Үздік индустриялық жоба», «Үздік инновациялық жоба» арнайы сыйлықтарының дипломдары мен белгілерін Мемлекет басшысы табыстайды. 

«Парыз» бизнестің әлеуметтік жауапкершілігі жөніндегі жыл сайынғы республикалық байқауын ҚР Еңбек және халықты әлеуметтік қорғау министрлігімен 2008 жылдан бері өткізіліп келеді. 

Естеріңізге салайық, 2008 жылдан бастап «Парыз» байқауына 5 мыңнан астам кәсіпкерлік субъектісі қатысты, 284 кәсіпорын лауреат атағын алды. 

Бас жүлдені корпоративтік әлеуметтік және экологиялық жауапкершілік қағидаттарын іске асыруда жоғары нәтижелерге қол жеткізген үміткерлерге беріледі. Бас жүлдені 2008 жылы – «Қазақмыс» корпорациясы» ЖШС, 2009 жылы – «Торғай Петролеум» АҚ, 2010 жылы – «СНПС-Ақтөбемұнайгаз» АҚ, 2011 жылы – «Теңізшевроил» ЖШС, 2012 жылы – «ҚазТрансОйл» АҚ, 2013 жылы – «Өскемен титан-магний комбинаты» АҚ, 2014 жылы – «СП «Қазгермұнай» ЖШС, 2015 жылы – «Самұрық Энерго» АҚ, 2016 жылы – «Ақсайгазсервис» АҚ, 2017 жылы – «Еуразиялық топ» ЖШС, 2018 жылы – «Қазмырыш» ЖШС алды.


Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-ботқа жазылыңыз


Жаңалықтар тізбегі
25 Мамыр 2020, 20:51
Фармацевтика саласын жаңғырту және қорғаныш өнімдерін шығару: ТЖ кезінде қазақстандық кәсіпорындардың өндірісі қалай дамыды
25 Мамыр 2020, 19:39
Ведомствоаралық комиссия өңірлерде бірқатар қызмет түрлерін іске қосу туралы шешім қабылдады
25 Мамыр 2020, 18:09
Болат Мажағұлов ҚР АҚДМ Этносаралық қатынастарды дамыту комитетінің төрағасы болып тағайындалды
25 Мамыр 2020, 15:52
Қазақстан Президенті Нұр-Сұлтан қаласының әкімі Алтай Көлгіновті қабылдады
25 Мамыр 2020, 10:46
26 мамыр күні Үкімет үйінде Қазақстан Үкіметінің отырысы өтеді
24 Мамыр 2020, 11:00
Видеодайджест: «Аптаның айшықты оқиғалары» №62
24 Мамыр 2020, 08:38
ҚР Премьер-Министрі Асқар Мамин қазақстандықтарды Ораза айт мерекесімен құттықтады
24 Мамыр 2020, 08:25
Қазақстан Республикасының Тұңғыш Президенті – Елбасы Нұрсұлтан Назарбаевтың Ораза айт мерекесімен құттықтауы
24 Мамыр 2020, 08:08
Мемлекет басшысы Қасым-Жомарт Тоқаевтың Қазақстан мұсылмандарын Ораза айт мерекесімен құттықтауы
23 Мамыр 2020, 21:43
ҚР Премьер-Министрі Асқар Маминнің Алматы облысына жұмыс сапарының қорытындысы бойынша видеодайджест
23 Мамыр 2020, 18:51
ШОБ, инвестициялар және экспорт: Алматы облысында қай салаға баса көңіл бөлінген
23 Мамыр 2020, 17:26
ҚР Премьер-Министрі А. Мамин Алматы облысында гидротехникалық құрылыстардың жай-күйімен және өңірді дамыту бағдарламаларының іске асырылуымен танысты
22 Мамыр 2020, 16:24
ҚР Премьер-Министрі А. Мамин Түркістан облысы Мақтаарал ауданындағы қалпына келтіру жұмыстарын тексерді
22 Мамыр 2020, 10:43
Мемлекет басшысы Филиппин мен Аустралиядағы елшілерді тағайындады
22 Мамыр 2020, 08:28
ҚР Премьер-Министрінің орынбасары Ералы Тоғжанов Қарағанды облысында «Жұмыспен қамтудың жол картасын» іске асыру барысымен танысты
21 Мамыр 2020, 12:44
Елорда барлық өңірге үлгі болуы тиіс — А. Мамин 
20 Мамыр 2020, 18:11
Мемлекет басшысы Қаржы министрі Ерұлан Жамаубаевты қабылдады
20 Мамыр 2020, 18:00
Р. Скляр германиялық компаниялармен машинажасау саласындағы екіжақты ынтымақтастықты дамыту мәселесін талқылады
20 Мамыр 2020, 15:42
Қазақстан Республикасы Үкіметінің 2020 жылғы 20 мамырдағы №305 Қаулысы
20 Мамыр 2020, 15:27
Мемлекет басшысы Қасым-Жомарт Тоқаев Ресей Федерациясының Қазақстандағы елшісі Алексей Бородавкинді қабылдады
20 Мамыр 2020, 15:25
Президент Қасым-Жомарт Тоқаев «Астана» халықаралық қаржы орталығының Басқарушысы Қайрат Келімбетовты қабылдады
20 Мамыр 2020, 15:22
Нұрсұлтан Назарбаев «Самұрық-Қазына» ҰӘҚ» АҚ басқармасының төрағасы Ахметжан Есімовті қабылдады
20 Мамыр 2020, 15:10
Қазақстан Республикасы Үкіметінің 2020 жылғы 20 мамырдағы №306 Қаулысы
19 Мамыр 2020, 18:25
Елбасы Парламент Мәжілісінің Төрағасы Нұрлан Нығматулинді қабылдады
19 Мамыр 2020, 17:35
ҚР Үкіметінің отырысы, 19.05.2020
19 Мамыр 2020, 17:19
Қазақстан Республикасы Үкіметінің 2020 жылғы 18 мамырдағы №302 Қаулысы
19 Мамыр 2020, 15:22
Жыл басынан бері 118 мың адам «Еңбек» бағдарламасы бойынша жұмысқа орналасты — Б. Нұрымбетов
19 Мамыр 2020, 14:08
Р. Дәленов: Кешенді жоспардың басты мақсаты тұрғындарды жұмыспен қамту
19 Мамыр 2020, 13:53
Жыл сайын мемлекет 365 мың тонна ауыл шаруашылығы өнімін кепілдендірілген түрде сатып алады
19 Мамыр 2020, 12:36
«5-10-20» жаңа бағдарламасымен тұрғын үйді кім ала алады
19 Мамыр 2020, 11:49
2020 жылдың соңына дейінгі кешенді жоспар экономикалық белсенділікті жандандыруға ықпал етеді — Р. Дәленов
19 Мамыр 2020, 10:02
Үкімет Экономикалық өсімді қалпына келтіру жөніндегі кешенді жоспарды қабылдады
19 Мамыр 2020, 09:01
ҚР Премьер-Министрі Асқар Мамин Қаржы министрлігінің жаңа басшысын таныстырды
19 Мамыр 2020, 08:25
Роман Скляр Түркістан облысындағы қалпына келтіру жұмыстарының барысын тексерді
18 Мамыр 2020, 19:00
Қазақстанда 720 мың тонна көлеміндегі әлеуметтік маңызы бар азық-түлік қоры қарастырылған
18 Мамыр 2020, 18:44
Ерұлан Жамаубаев ҚР қаржы министрі болып тағайындалды
18 Мамыр 2020, 18:39
Әлихан Смайылов ҚР Премьер-Министрінің бірінші орынбасары болып тағайындалды
18 Мамыр 2020, 17:44
Ведомствоаралық комиссия отырысында елдегі эпидемиологиялық жағдай қаралды
18 Мамыр 2020, 14:44
19 мамыр күні Үкімет үйінде Қазақстан Үкіметінің отырысы өтеді
18 Мамыр 2020, 12:23
Қазақстан Республикасы Үкіметінің 2020 жылғы 14 мамырдағы №301 Қаулысы
17 Мамыр 2020, 09:39
Видеодайджест: «Аптаның айшықты оқиғалары» №61
16 Мамыр 2020, 22:29
Жұмыссыздықпен күрес және тірек ауылдарын абаттандыру — Шығыс Қазақстан облысының қазіргі даму бағыты қандай
16 Мамыр 2020, 21:40
ҚР Премьер-Министрі Асқар Маминнің Шығыс Қазақстан облысына жұмыс сапарының қорытындысы бойынша видеодайджест
16 Мамыр 2020, 14:36
ҚР Премьер-Министрі Асқар Мамин Семей қаласының дамуымен және Абайдың 175 жылдығына дайындығымен танысты
15 Мамыр 2020, 22:03
Мемлекет басшысы Ұлттық банк төрағасы Ерболат Досаевты қабылдады
15 Мамыр 2020, 16:22
ҚР Премьер-Министрі А. Мамин ШҚО-да көктемгі егіс жұмысының барысы мен өңірдің әлеуметтік-экономикалық дамуын тексерді
15 Мамыр 2020, 13:34
Нұргүл Мауберлинова ҚР Президенті Әкімшілігінің Ішкі саясат бөлімінің меңгерушісі болып тағайындалды
14 Мамыр 2020, 18:39
Ауыл шаруашылығынан туризмге дейін немесе Ақмола облысының негізгі салалары қалай дамып жатыр
14 Мамыр 2020, 18:14
ҚР Премьер-Министрінің орынбасары Ералы Тоғжанов бастаған Үкімет делегациясы жұмыс сапарымен Атырау облысына барды
14 Мамыр 2020, 17:31
Қазақстан Республикасы Үкіметінің 2020 жылғы 14 мамырдағы №296 Қаулысы
Депутаттық сауал
© 2019 - 2020 Қазақстан Республикасы Премьер-Министрінің Баспасөз Қызметі.
SoftDeCo компаниясының жобасы.