Серік Жұманғарин: Қапталған су мен сусындар таңбаланбайды

Кеше ҚР Премьер-Министрдің орынбасары – сауда және интеграция министрі Серік Жұманғарин «Атамекен» Ұлттық кәсіпкерлер палатасының алаңында бизнеспен таңбалау мәселелерін талқылады.

Талқылау барысында зергерлік бұйымдарды, қапталған су мен сусындарды, аяқ киімді, фармацевтикалық тауарларды таңбалау мәселелері көтерілді. 

Кездесуде қапталған су мен құрамында қант бар сусындарды таңбалаудың пилоттық жобасы қорытындыланды. Жобаға 13-ке жуық кәсіпорын қатысты. 

«Пилоттық жобаның қорытындысы бойынша бірқатар кемшіліктер анықталды, бұл елде таңбалауға арналған жабдықтардың, баспаханалардың болмауы, контрафактілер, сондай-ақ өндірушілерге қаржылық жүктеме салдарынан шығарылатын өнімнің қымбаттауы. Талқылау нәтижелері бойынша бизнес-қоғамдастықпен ел ішінде міндетті таңбалауды енгізудің орынсыздығы туралы шешім қабылданды», — деді Серік Жұманғарин.

Еске сала кетейік, тауарларды цифрлық таңбалау жүйесін енгізудің негізгі мақсаттарының бірі көлеңкелі импортқа қарсы күрес болды. Статистика деректері бойынша, Қазақстанға аяқ киім импорты 34,8%-ға-2019 жылғы 39,5 млн жұптан 2021 жылы 53,2 млн жұпқа дейін ұлғайды. ҚР ҚМ МКК деректері бойынша, 2021 жылы аяқ киім әкелуден кедендік баждар мен салықтарды төлеу сомасы 2019 жылмен салыстырғанда екі есе өсіп, 30 млрд теңгені құрады (2019 жылы – 14,5 млрд теңге).

2022 жылдың 8 айында кедендік баждар мен салықтарды төлеу сомасы 14 млрд теңгені құрады.

Мамандандырылған дүкендердегі аяқ киім мен былғары бұйымдарының бөлшек саудасынан түсетін салық түсімдері 2019 жылғы 2,7 млрд теңгеден 2021 жылы 7,9 млрд теңгеге дейін 2,9 есеге жуық өсті.

2022 жылдың 8 айында салық түсімдері 6,8 млрд теңгені құрады.

Айта кету керек, бүгінгі таңда таңбалау бизнес үшін жеңілдіктерді ескере отырып, толық көлемде жұмыс істемейді.

Талқылау қорытындысы бойынша «Атамекен» Ұлттық кәсіпкерлер палатасы төралқасының төрағасы Райымбек Баталов аяқ киім мен фармацевтикалық өнімдерді таңбалау мәселелері бойынша тағы да жеке кездесу ұйымдастырылатынын атап өтті. Талқылауға 20-дан астам бизнес және қауымдастық өкілдері қатысты.

Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз

Жазылу