ҚР Үкіметінің отырысы, 24.12.2024

24 күні Цифрлық үкімет кеңсесінде Премьер-министр Олжас Бектеновтің төрағалығымен Қазақстан Үкіметінің көшпелі отырысы өтті.

Күнделікті қызметке жаңа цифрлық технологиялар мен жасанды интеллектіні енгізу мәселелері қаралды. Осы бағытта жүргізіліп жатқан жұмыстар туралы цифрлық даму, инновациялар және аэроғарыш өнеркәсібі министрі Жаслан Мәдиев баяндады. 

Премьер-министрдің тапсырмасына сәйкес Еңбек және халықты әлеуметтік қорғау министрлігі цифрлық ведомствомен бірлесіп Отбасының цифрлық картасында әкімдер рейтингі мониторингінің автоматтандырылған функционалын әзірледі. Адамдарды өмірлік қиын жағдайдан шығарудың тиімділігіне талдау әрбір аудан, қала және облыс бойынша жүргізіледі. Бұл туралы Үкімет отырысында еңбек және халықты әлеуметтік қорғау министрі Светлана Жақыпова баяндады.

Отандық цифрлық шешімдер: «Әлеуметтік әмиян», «ОТӨ тізілімі», «Онлайн-нотариус» жобалары, E-Otinish азаматтардың сұраныстарын жүйелеуге арналған платформасы және басқаларын іске асыру мысалдары көрсетілді.

Премьер-министр экономикалық процестерді ынталандыру үшін цифрлық орта құрудың маңызын атап өтті. Барлық дамыған елдер цифрландыру мен жасанды интеллектіні дамытуға инвестиция салып, өз стратегияларын жасауда. Қазақстанда цифрлық технологиялар бүгінде өнеркәсіп, экология, денсаулық сақтау, білім беру, жұмысқа орналастыру, әлеуметтік және заңгерлік қолдау, салық секторы және бизнес-орта салаларында енгізіліп, белсенді пайдаланылып жатыр.

Премьер-министр жеке деректерді қорғауға, киберқауіпсіздік мәселелеріне, этикалық нормаларға және ЖИ қолдану арқылы қабылданған шешімдер үшін жауапкершілікке баса назар аударды.

Сондай-ақ Цифрлық даму, инновациялар және аэроғарыш өнеркәсібі министрлігіне мүдделі мемлекеттік органдармен және әкімдіктермен бірлесіп, цифрлық технологиялар мен жасанды интеллектіні іске асыратын және енгізетін кәсіпорындарды қолдаудың нақты шараларын әзірлеу тапсырылды.