ҚР Үкіметінің отырысы, 28.11.2023

28 қарашада Үкімет үйінде Қазақстан Үкіметінің отырысы өтті. 

• ҚР Премьер-Министрі Әлихан Смайыловтың төрағалығымен өткен Үкімет отырысында күн тәртібінен тыс қызылша жұқтыру жағдайларының артуы қаралды. Денсаулық сақтау министрі Ажар Ғинияттың айтуынша, әлемнің 167 елінде қызылша бойынша ахуал ушығып барады, 415 мыңнан астам жағдай тіркелген. Қазақстанда 17 мыңнан астам жағдай тіркелді. Олардың 82%-дан астамы - балалар, олардың көбі екпе алмаған.

• Премьер-Министр балалардың денсаулығына теріс әсер ететін қызылшамен сырқаттанушылықтың артуын мүмкіндігінше тезірек тоқтату қажеттігін атап өтті. Үкімет басшысы онымен денсаулық сақтау жүйесі ғана емес, бүкіл қоғам күресуі керек екенін атап өтті. Қызылшаға қарсы екпе егу жұмыстарын күшейтуді, Денсаулық сақтау министрлігі мен әкімдіктерге тиісті ақпараттық-түсіндіру жұмыстарын жандандыруды тапсырды.

• Сонымен қатар Үкімет отырысында автожол саласын одан әрі дамыту жөніндегі шаралар қаралды. Көлік министрі Марат Қарабаев биыл құрылыс-монтаждау жұмыстарымен 10,7 мың шақырым автомобиль жолдары қамтылғанын баяндады. Жүргізілген жұмыстардың қорытындысы бойынша республикалық деңгейде нормативтік жай-күйдегі жолдардың үлесі 92%-ға, жергілікті деңгейде 87%-ға жетеді.

• Үкімет басшысы тұрғындар жолдардың нашарлығы туралы үнемі сын айтатынын атап өтті. Жолдардың сапасыз жөнделуі халықтың ерекше наразылығын тудырады. Премьер-Министр әкімдерге жолдардың жай-күйіне тұрақты негізде мониторинг жүргізу және оларды жөндеу бойынша жедел шаралар қабылдау қажеттігін атап өтті.

• ҚР Премьер-Министрі Әлихан Смайыловтың төрағалығымен өткен Үкімет отырысында тауар биржаларын дамыту мәселелері қаралды. Сауда және интеграция министрі Арман Шаққалиевтің айтуынша, биржалық сауда мәселелері бойынша жаңа заң жобасы әзірленді. Онда биржаларға қойылатын реттеушілік талаптарды күшейту, жер қойнауын пайдаланушылардың сатып алу рәсімдерін айналып өту мүмкіндігін және бизнес үшін тауар биржаларына шығу бойынша кедергілерді жою жөніндегі шаралар көзделеді.

• Әлихан Смайылов биржалық тауарлар мәселесі бойынша заң жобасына Үкімет қорытындысының жобасын келісуді, қазіргі әлемдік стандарттарды ескере отырып, тауар биржаларын бағдарламалық қамтамасыз етудегі ақпараттық қауіпсіздікті арттыру мәселесін пысықтауды және Әкімшілік құқық бұзушылық туралы кодекске тауар биржалары мен оның қатысушыларының жауапкершілігін қатаңдату бойынша түзетулер топтамасын әзірлеуді тапсырды.