10 Қазан 2019, 20:32
2019 жылғы 8-9 қазанда ҚР Премьер-Министрі Асқар Мамин жұмыс сапарымен Шығыс Қазақстан, Алматы және Қарағанды облыстарына барды.
Қазақстан Премьер-Министрі Мемлекет басшысы Қасым-Жомарт Тоқаевтың ел өңірлеріне жұмыс сапарлары аясында берген тапсырмаларын іске асыру барысын тексерді. ҚР Тұңғыш Президенті ‒ Елбасы Нұрсұлтан Назарбаев еліміздің тұрақты көлік инфрақұрылымын дамыту мақсатында бастамашы болған «Нұрлы жол» мемлекеттік бағдарламасын орындауға баса көңіл бөлінді.
Семей қаласында ҚР Премьер-Министрі Асқар Мамин қала активімен Семей қаласының әлеуметтік-экономикалық дамуының 2020-2025 жылдарға арналған Кешенді жоспарын іске асыру мәселелері, сондай-ақ Абайдың 175 жылдығын атап өтуге дайындық жөнінде кеңес өткізді.
А. Мамин «СемАз» ЖШС және «Daewoo Bus Kazakhstan» автомобиль құрастыру кәсіпорындарының жұмысымен танысты.
Үкімет басшысы «Қарағайлы» ықшам ауданында көпқабатты тұрғын үйлердің және «Абай Арена» мәдени-спорт кешенінің құрылысын қарады.
Өскеменде Премьер-Министр қатерлі ісік ауруларын мамандандырылған емдеудің түрлі түрлері жүзеге асырылатын Шығыс Қазақстан облыстық көпбейінді «Онкология және Хирурги орталығына» барды.
Роботтандырылған хирургия, ангиохирургия және трансплантология орталығында Асқар Маминге өңірдің денсаулық сақтау саласын дамытудың кешенді жоспарын іске асыру нәтижелері туралы баяндалды.
Асқар Мамин ШҚО әкімінің Ведомствоаралық ситуациялық және инвестициялық орталығына барды. Нысан «Цифрлық Қазақстан» мемлекеттік бағдарламасын іске асыру аясында ашылған және биылғы 15 шілдеде пайдалануға берілді.
Шығыс Қазақстан облысының Аягөз ауданында Премьер-Министр индустриалды-инновациялық даму мемлекеттік бағдарламасы аясында әлемдегі ең ірі игерілмеген мыс кен орындарының бірі ‒ Ақтоғай кенішін игеріп жатқан «KAZ Minerals Aktogay» кәсіпорнының жұмысымен танысты.
Шығыс Қазақстан облысында Асқар Мамин «Өскемен ‒ Талдықорған» автожолын салу жобасының іске асырылу барысымен танысты.
Алматы облысында ҚР Премьер-Министрі А. Мамин «Өскемен ‒ Талдықорған», «Үшарал ‒ Достық» жобаларын іске асыру жөнінде жұмыс кеңесін өткізді.
Қарағанды облысында «Қарағанды – Балқаш» автожолының учаскесіндегі жұмыстар тексерілді.
Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз
Жазылу