26 Қазан 2019, 22:52
2019 жылғы 25 қазанда ҚР Премьер-Министрі Асқар Мамин Мәскеу қаласында Тәуелсіз Мемлекеттер Достастығының (ТМД) Үкімет басшылары кеңесінің (ҮБК) және Еуразиялық үкіметаралық кеңестің (ЕҮАК) отырыстарына қатысты, сондай-ақ, РФ Үкіметінің Төрағасы Дмитрий Медведевпен кездесу өткізді.
Үкімет басшылары кеңесінің отырысы шағын және кеңейтілген құрамдарда өтті.
Үкімет басшылары шағын құрамда ТМД форматындағы экономикалық өзара іс-қимылдың өзекті мәселелері бойынша пікір алмасты.
Кеңейтілген форматтағы отырыста Достастыққа мүше мемлекеттердің қоғамды цифрлық дамыту саласындағы ынтымақтастық тұжырымдамасына және оны іске асырудың бірінші кезектегі іс-шаралар жоспарына, сондай-ақ, ТМД-ға қатысушы мемлекеттердің ақпараттық қауіпсіздігін қамтамасыз ету стратегиясына баса көңіл бөлінді.
Отырыс қорытындысы бойынша Достастық елдерінің стандарттау, ветеринария, монополияға қарсы реттеу, радионавигацияны дамыту, уран өндірісі салдарына ұшыраған мемлекеттердің аумақтарын қалпына келтіру саласындағы ынтымақтастығын реттейтін бірқатар құжаттар қабылданды.
Еуразиялық үкіметаралық кеңестің отырысы да дәстүрлі түрде шағын және кеңейтілген форматтарда өтті.
Отырысқа қатысушылар қол жеткізілген уағдаластықтардың орындалуының аралық қорытындыларын шығарып, алдағы жұмыстың бағыттарын анықтады.
А. Мамин ауыл шаруашылығы өнімдерінің экспортын ұлғайту бойынша нақты шараларды қабылдауға, дәрі-дәрмектер нарығында бәсекеге қабілетті жағдайлар жасау бойынша ұсыныстар әзірлеуге шақырды.
ЕҮАК отырысының қорытындысы бойынша Сербия Республикасымен Еркін сауда аймағы туралы келісімді қоса алғанда, бірқатар құжатқа қол қойылды.
Сол күні ҚР Премьер-Министрі А. Мамин РФ Үкіметінің Төрағасы Д. Медведевпен кездесті, онда сауда-экономикалық өзара іс-қимылды, транзиттік-көлік және өнеркәсіптік салалардағы ынтымақтастықты одан әрі дамыту мәселелері талқыланды.
Қазақстанның Премьер-Министрі мен Үкіметі жаңалықтарынан хабардар болыңыз — ресми Telegram-каналға жазылыңыз
Жазылу