Видеодайджест: «Аптаның айшықты оқиғалары» №83

2023 жылғы 14-20 тамыз аралығындағы аптаның айшықты оқиғалары

• ҚР Премьер-Министрі Әлихан Смайылов Астанадағы «Тұран» және «Оңтүстік-Шығыс» газ жылу стансалары (ГЖС) мен 3-ЖЭО құрылысының барысымен танысты. Жалпы жаңа ГЖС-ның артықшылығы – табиғи газды және дизельді үнемді тұтынуға мүмкіндік беретін шағын қазандықтар. Оларды іске қосу астаналықтар үшін жылу профицитін береді.

• Сейсенбі, 15 тамызда, ҚР Премьер-Министрі Әлихан Смайыловтың төрағалығымен өткен Үкімет отырысында еліміздің әлеуметтік-экономикалық даму қорытындылары мен республикалық бюджеттің атқарылуы қаралды. Сонымен қатар жаңа оқу жылына дайындық барысы талқыланды. 1 қыркүйектен бастап Қазақстандағы бастауыш сынып оқушыларының барлығы мектепте тегін тамақпен қамтылмақ.

• 16 тамызда Астанада Әлихан Смайылов Башқұртстанның үкіметтік делегациясымен кездесті. Сауда, өнеркәсіп кооперациясы, ауыл шаруашылығы, логистика, туризм және мәдениет салаларындағы ынтымақтастықтың өзекті мәселелері талқыланды. 2022 жылдың қорытындысы бойынша өзара тауар айналымы шамамен $382 млн-ды құрады.

• 17 тамызда ҚР Премьер-Министрінің төрағалығымен Үкіметте өткен кеңесте батыс өңірін, атап айтқанда, Маңғыстау облысын электрмен тұрақты түрде қамтамасыз ету мәселелері қаралды. Әлихан Смайылов өңір үшін қажетті жобаларды іске асыруды жеделдетуді талап етті.

• ҚР Премьер-Министрі Әлихан Смайылов Қарағанды облысындағы «АрселорМиттал Теміртау» АҚ-ның «Қазақстан» шахтасында орын алған жағдай бойынша кеңес өткізді. Премьер-Министр «Қазақстан» шахтасындағы апаттың себептерін жан-жақты тексеру үшін комиссияның жұмысын сапалы қамтамасыз етуді және зардап шеккен отбасыларға барлық қажетті көмекті көрсетуді тапсырды.

• Сенбі, 19 тамызда, ҚР Премьер-Министрі Әлихан Смайылов Қарағанды облысындағы «АрселорМиттал Теміртау» АҚ «Қазақстан» шахтасында апат салдарынан қаза тапқан шахтерлердің отбасы мүшелерімен кездесіп, ауруханада жатқан зардап шеккен кеншілерге барды.

• АМТ-да қызмет етудің барлық кезеңінде жұмысшылар үшін қауіпсіздік тиісті деңгейде жасалмай, басты назар тек пайда табуға аударылды. Бұл туралы Шахтинск қаласында өткен кеңестің қорытындысы бойынша Премьер-Министр мәлімдеді.